Μορφή αναζήτησης

Mal 11

Nkotulu Yesu ku Yerusalemi

(Mat 21.1-11; Luk 19.28-40; Yow 12.12-19)

1Bu bakokosolo na Yerusalemi, bebele na mabula ma Betefange na Betanya, ku teke mulaandu wa Mi-olive, Yesu waheeke boolo mu bayiki baandi, 2na wabaleele ti: «Yendee ha bula buri ha mankula, bu lusa na tsee, sa lwamono mwaana mpuunda wakaangu, wuri muutu ti mosi kanweeti ko; munyanguneenu na mutwaaleenu. 3Mbuti muutu wulufuuriri ti: "Buri lusa bubwo?" Lo muleelee ti: "Mfumu wuri na nzala yo. Hanaho nde sa kaheeke yo hamaha."»

4Bo boolo bayende, na bamono mwaana mpuunda wakaangu ha teke mweelu, ku mbasi mu nzila, na bamunyanguna. 5Babamosi mu baatu baba haho, bafuula kuri bo ti: «Nki luri mu kusa mu kunyanguna mwaana mpuunda?» 6Bo baha mvutu bwaba baleele Yesu, na baatu babo babahemese. 7Bo banata mwaana mpuunda kuri Yesu. Bayala binkuta bya bo ha yulu mwaana mpuunda, na Yesu wadzakala ha yulu yo. 8Baatu balaka bayala binkuta bya bo mu nzila; bakaka bakoolo bimpaala bya miti mu manseke. 9Baatu baba kweyende ku mankula, na baba kwenama ku mambisa baba kwebikisa ti: «Hosana, kaba wasakumuna wunde wiisiri mu nkuumbu Mfumu! 10Kiba kyasakumunu kimfumu kya taayi dyeetu Davidi, kiisiri. Hosana kunu kinsongi-yulu!» 11Yesu katubukaa ku Yerusalemi, kotiri mu Nzo-nzaambi. Bu katala mpele na mpele, wamono kuri ti ntaangu yimwaaluta, nde wapala mu kweende ku Betanya na bo kuumi na boolo.

Yesu wabulila mungenge mpopi

(Mat 21.18-19)

12Bwiisi bukyaanaa, bo bapala mu Betanya, na Yesu wabaka nzala. 13Bu katalila ku la, mungenge waba na makaya, nde wayende mu kuri ti kampe lo bakiri ngenge dza kudya. Bu kakokosolo, wahele kubaka kitotolo, ha yulu mani makaya, bukuri yaba yiri ntaangu ya ngenge ko. 14Nde waleele kuri mungenge ti: «Fuu kya bufulukutuu, kuri muutu ti mosi wudya kimbutu kya ye ko!» Bayiki baandi baba yuka.

Yesu wabinga baba yarikaa mu Nzo-nzaambi

(Mat 21.12-17; Luk 19.45-48; Yow 2.13-22)

15Bo batubuka ku Yerusalemi, na bakoto mu Nzo-Nzaambi. Yesu wabeke mu kubingisa baatu baba yarikaana na baba suumbaana mu Nzo-nzaambi, watuba ku mbasi mataabala ma baba yiingaana mboongo, na wabwiisa bidzakukulu bya baba yarikaa mabeembe. 16Nde kasii tala ko ti muutu kapala na kitotolo munsa Nzo-nzaambi. 17Nde wabayikisa wabaleele ti: «Diri dyatinu ti: "Nzo yaami sa bayiteele ti nzo lusaambulu ya makaanda momanso." Ngo Beenu lumwaasa yo, ntari bangaa-bumfuna.» 18Bakuutu ba bangaa-nzaambi na batini ba mangisi bayukaa mayirimini, basaka bwa kumudzusila. Bo baba mubataana, bukuri mpuumbu yoyinso yaba yitiiri nyikusulu dzaandi. 19Nsinsika bu yatubuka, bo bapala mu bvula.

Mungenge wakana

(Mat 21.20-22)

20Bo babaanaa beki luta mu nzila kipari, bamono mungenge wakana natee ku myaansi. 21Petelo wabaambuka mwooyo na waleele kuri Yesu ti: «Muyikisi, mono mungenge wu wabee bulila ye mpopi weki wakana.» 22Yesu wabvutula kuri bo ti: «Beenee na kanyi mu Nzaambi! 23Ngwanwa me nyululeeriri ti: "Muutu lo leeriri kuri mulaandu wumawu ti: Naanguma webwa mu mubu", mbuti wahele kuketekese munsa mutima waandi, ngo wasa kanyi ti ma kaleeriri mari mu kuyirima, lo sa mayirima kuri nde. 24Hango-nkuumbu, me nyiluleeriri ti, momanso ma lusambikila na ma luloombo, siilee kanyi ti lumwaa mataambula, lo sa mayirima kuri beenu. 25Lubaanaa lwateleme luri mu kusaambila, mbuti lwakebele muutu kooti, lo muhemesene, mpisi heki taayi dya beenu se diri mu mayulu, kaluhemesene lumvuki lweenu.» [26]

Kuri kwafumuna lutumu lwa Yesu?

(Mat 21.23-27; Luk 20.1-8)

27Bo babweese kweende ku Yerusalemi. Yesu, bu kaba mu kweyende munsa Nzo-Nzaambi, bakuutu ba bangaanga-nzaambi, batini ba mangisi na bakulu ba babakala bakokosolo kuri nde. 28Bamufuula ti: «Mu nkya lutumu ye wuri mu kweyirikila mamo? Bunu pe, na wakuha lutumu lulwo lu wuri mu kweyirikila mamo?» 29Ngo kasi Yesu waleele kuri bo ti: «Kifuuri kimosi me nyiluha. Mpeenee mvutu; tumi me nyiluleele mu nkya lutumu me nyiri mu kweyirikila mamo. 30Mbotokulu ya Yowane yiri ya ku yulu hoti ya baatu? Mpeenee mvutu!» 31Bo balelesene bo na bo ti: "Mbuti tuleeriri ti: Ya ku yulu", lo nde bee leeriri ti: "Hango buri lwaheriri kusiila kanyi mu nde?" 32Na mbuti tuleeriri ti: "Ya baatu!" Bo baba bata mpuumbu baatu, bukuri bobanso baba monaa ti Yowane nkati mubikiri wangwanwa. 33Bo ha beki bvutulaana kuri Yesu ti: «Beetu twahele kuyaaba.» Yesu wabvutula kuri bo ti: «Me se nyiluleele ko, mu nkya lutumu me nyiri mu kweyirikila mamo.»

Musamu Wamubwete

©2013 Bible Society of the Republic of Congo

More Info | Version Index