Μορφή αναζήτησης

ULANGEN 3

Israel naluken Raja Og

(Bil. 21:31-35)

1“Kenca bage maka miser kita kempak Utara, ku daerah Basan. Reh Raja Og ras tenterana; iperangna kita ndeher kuta Edrei. 2Tapi ngerana TUHAN man bangku nina, ‘Ola mbiar man bana. Ia, anak buahna ras negerina Kubereken man bandu. Bahan lah man bana bagi perbahanenndu man Sihon raja bangsa Amori si ringan i Hesbon.’

3E maka iendesken TUHAN pe ku teruh kuasanta Raja Og ras rayatna. Sibunuhi ia kerina. 4I bas paksa e me sitaluken kerina kutana; la lit sada pe si tading-tading. Lit buena enem puluh kuta kerina i daerah Argop ingan Raja Og merentah.

5Kerina kuta-kuta e, erbentengken tembok si meganjang; lit kerina pintu gerbangna, janah beloti jadi eruk-erukna. Janah melala nge kuta-kuta si la ertembok. 6Sikerapken kerina kutana. Sibunuhi kerina dilaki, diberu ras anak-anakna, bali ras perbahanenta nandangi kuta-kuta Raja Sihon i Hesbon nari. 7Sibuati asuh-asuhenna. Sirampasi kuta-kutana.

8Bage me, i bas paksa si e sirampas i bas raja bangsa Amori si dua e, taneh si lit i Timur Lau Jordan, i Lau Arnon nari seh ku Deleng Hermon. ( 9Deleng Hermon e, Sirion ibahan bangsa Sidon gelarna, tapi Senir nina bangsa Amori.) 10Kerina daerah Raja Og i Basan si irampas kita e me: kuta-kuta i taneh kendit Gileat ras Basan, seh ku Timur ku kuta-kuta Salka ras Edrei.”

( 11Raja Og e me kalak Repaim si perpudina kal. Peti inganna mate ibahan i bas batu nari, gedangna empat meter, belangna sitik nari la dua meter rikutken ukuren biasa. Banci denga inen enda genduari i Rabba, kuta bangsa Amon.)

Suku-suku si ngiani taneh arah Timur Lau Jordan

(Bil. 32:1-42)

12“Kenca enggo man banta taneh e, kubereken man suku Ruben ras Gat daerah i Utara Aroer deher Lau Arnon ras sada bagin negeri deleng-deleng Gileat rikut ras kerina kuta-kuta si lit i je. 13Deleng-deleng Gileat si debanna kubereken man setengah suku Manase, ikut pe daerah Basan ingan Og merentah mbarenda, e me kerina daerah Argop.”

(Basan igelari negeri kalak Repaim. 14Jair, e me sekalak i bas suku bangsa Manase nari, ngiani kerina daerah Argop, e me daerah Basan seh ku perbalengen Gesur ras Maaka. Ibanna gelar kuta-kuta e bali ras gelarna. E maka seh ngayak genduari gelar kuta-kuta e igelari kuta-kuta Jair.)

15“Gileat kubereken man terpuk Mahir i bas suku Manase nari. 16Janah man suku Ruben ras Gat, kubereken daerah i Gileat nari seh ku Lau Arnon. Balengna arah Selatan e me pertengahen Lau Arnon, janah arah Utara balengna e me Lau Jabok, si sada bagin jadi baleng ras daerah bangsa Amon. 17Arah Barat daerah enda seh ku Lau Jordan, mulai i Dano Galilea nari i Utara seh ku Lawit Mate i Selatan, jenari ku deleng-deleng Pisga arah Timur.

18I bas paksa si e me kubereken perentah enda, ‘ TUHAN Dibatandu enggo mereken man bandu taneh si arah Timur enda gelah i je kam tading. Genduari sikapkenlah persenjatan tenterandu. Suruh ia leben asa suku-suku Israel si deban ngepari Lau Jordan, gelah isampatina kalak e naluken negeri si man inganen e. 19Si banci tading arah pudi, i kuta-kuta si enggo kubereken man bandu e me: ndeharandu, anak-anak, asuh-asuhen, sabap kueteh maka tuhu melala asuh-asuhenndu. 20Sampati lah temanndu kalak Israel seh italukenna negeri si arah Barat Lau Jordan si ibereken TUHAN atena man kalak enda, seh ibere TUHAN ia ringan i je nggeluh alu dame, bali ras si enggo ibahanNa man bandu i jenda. Kenca bage maka banci kam mulih ku negeri si enggo kutentuken man bandu.’

21Kenca bage maka kukataken man Josua, ‘Enggo idahndu kuga perbahanen TUHAN Dibatandu man raja si dua e, e me Raja Sihon ras Og. Bage me pe perbahanen TUHAN man raja-raja si deban si iperangndu atendu negerina.

22Ola kam mbiar ngenen kalak e, sabap TUHAN Dibatandu si erperang guna kam.’ ”

Si Musa la ibere bengket ku negeri Kanaan

23“I bas paksa e ertoto aku, tutus kal ateku, ningku, 24‘O TUHAN si Mada Kuasa, kueteh maka si enggo icidahkenNdu man bangku e, perbahanen si mbelin ras tanda kuasa si pemana kap, sabap melala denga ateNdu tole ibahanNdu. La lit dibata-dibata i langit ras i doni si ngasup ngelakoken perbahanen si mbelin bagi si enggo ibahanNdu! 25Bere lah min aku ngepari Lau Jordan, o TUHAN, gelah banci kuidah taneh si mehumur arah lepar ah, negeri uruk-uruk si mejile ras deleng-deleng Libanon.’

26Tapi erkiteken kam merawa TUHAN man bangku e maka la iberekenNa pemindonku. Tapi niNa, ‘Enggo bias! Olanai singetken e! 27To nangkih ku das tampuk Deleng Pisga, jenari tatap kempak Utara ras kempak Selatan, kempak Timur ras kempak Barat. Perdiateken lah alu manjar-anjar kai si idahndu, sabap kam labo ndigan pe ngepari Lau Jordan. 28Berekenlah pedah-pedah man Josua, petetap ukurna, erkiteken ia me si mabai bangsa e ngepar, lako naluken negeri si idahndu e.’

29E me sabapna maka kita tading i berneh-berneh si petala-tala ras kuta Betpeor.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index