Μορφή αναζήτησης

KALATE METATAʼA 44

Bényamin a *élaé Yôsep

(Dt 8:2,16)

1Yôsep a nga bendé mbaʼale akume ya *nda jé na: Jaléʼé bidi e mimbeʼe mi bôte bana, abime be ne nguleya beʼe, a futiʼi moné môt ase anyu mbeʼe wé! 2Wo ye fe futi *élaé jam, *élaé argent, anyu mbeʼe nyô a ne mongô, a moné fône jé. Mbaʼale akum a nga bo ane Yôsep a nga jô nye.

3Mametyé, nné ane *môs ô nga kui, be nga suu bôte bete be ke a bijakase biap. 4Valé be kôlôya tison, ve be ngenane teke ke ôyap, éyoñe Yôsep a nga jô mbaʼale akume na: Kôlôʼô si, tôñôk bôte bete a koone be. Wo ye jô be na: Amu jé mi bulaneya *abé señe mvaé? 5Ye sa *élaé te e nje masa a nyu été a sa nje a belane je asu ya yeme mam yʼakiti? Mia te bo *abé ya bo nalé. 6Mbaʼale akum a nga koone be a baʼalane be mejô mete. 7Be nga yalane nye na: Amu jé masa wom a kobô nalé? Bebo bisaé bôé be se nguleya bo avale jame te 8e too ke na bi nga bulan wo moné bi nga koone nye e menyu mimbeʼe miangan bi soʼo Kanaan; bi mbe nguleya wube argent nge or aya e *nda masa wôé? 9E môte ya bebo bisaé bôé ba ye koon a bili jôm éziñ a woʼok, a biabebiene ke bi boʼok alo masa wom! 10Mbaʼale akum a nga yalane na: Nalé, ma zu bi mia nkobô wônane miabebien! Nyô ba ye koon a bili jôm éziñ a ye bo *ôlo viam, a mia mia ye ke *mvoʼé. 11Môt ase a nga jiʼa suu mbeʼe wé si a yoé wô. 12Mbaʼale akum a nga vune mie, ataté nya môtô a kui nyô a dañe mongô; a a nga koon *élaé e mbeʼe Bényamin. 13Be nga nyabe mengômesane map, môt ase a nga beta beté mimbeʼe éjakase jé yôp, a be nga bulan e tison.

14Yuda a bobenyañ be nga bulan e ndaa Yôsep, a koon a ngenan été, be nga ku si asu dé. 15Yôsep a nga jô be na: Za jame mi nga bo di? Ye mi mbe teke yeme na, môt, ane ma, a bili nguleya yeme mam yʼakiti? 16Yuda a nga yalane na: Me jô masa wome jé? Me jô aya? Bi ne kale biabebien aya? Zambe a te koone bebo bisaé bôé ékob été. Bia bana bi ntoo belo be masa wom, bia a nyô fe ba te koon a bili *élaé. 17Eyoñe te Yôsep a nga jô na: Me se nguleya bo nalé! E môte ba te koon a bili *élaé e nye a ne *ôlo viam; ve mia, kelane *mvoʼé e be ésoo wônan.

Yuda a yeʼelane Yôsep ajô Bényamin

(Met 42:29-38; 43:1-14)

18Eyoñe Yuda a nga zu nye bebé a jô na: Engôngo, a masa wom, kañeseʼe na mbo ésaé wôé a kobô wo, a na ayaa dôé e boʼo te yôñe nyôle mbo ésaé wôé! Amu ô ne ane Faraoñ. 19Masa wom a te sili bebo bisaé bé minsili a jôʼô na: Ye mi bili ésaa, nge monyañ? 20Bia te yalane masa wome na: Bi bili nnôm ésaa, a mone mojañ, ntume nnôme wé, monyañ wé a wuya; e nye étam a liʼiya abume nyia, a ésaa *a nyeʼe nye. 21Wo te jô bebo bisaé bôé na: Boʼone na a siliki be ma, me yene nye a mise mam mamien. 22Bia te yalane masa wome na: Mongô a se nguleya liʼi ésaa; nge a liʼi nye, ésaa a ye wu. 23Wo te jô bebo bisaé bôé na: Nge mone monyoñe wônan a bo te sis a mia, mia ye bo te beta yen asu dam. 24Eyoñe bi nga beta bete be mbo ésaé wôé, ésaa wom, bi nga kate nye nkobô masa wom. 25Esaa wongan a nga jô na: Bulaʼan, kusane bia abe bidi. 26Bi nga yalane na: Bi se nguleya sis; ve nge mone mojañ a ne a bia, bia ye sis, amu bi se nguleya yen asu môt ate, vengevenge ve mone mojañe wongan a ne a bia. 27Mbo ésaé wôé, ésaa wongan a nga jô bia na: Mia yeme na minga wom a nga biaé ma bone bebaé. 28Wua a kôlôya *nda jam, ma buni, teke selane na, be nga nyabe nye bifus, amu me nji nye beta yen a kui éyoñe ji. 29Nge mia beta nyoñe ma e nyôna, a nge mbia atemetema jam a kui be nye, mia ye bo me na me sise bifumulu bisile biam étabaʼa miñwuan e bidim été. 30Eyoñe ji, nge ma bulane be mbo ésaé wôé, ésaa wom, a nge mongô a nji bo a bia, mbôlô nsisime wé ô ne nlatan a éñwé, 31a ye wu, éyoñ a ye yene na mongô a nji bo valé. Bebo bisaé bôé be boya éyoñe te na bifumulu bisile bi mbo ésaé wôé, ésaa wongan, bi sis étabaʼa miñwuan e bidim été. 32Amu ma, mbo ésaé wôé, me nga nyoñe mbeʼe mongô, éyoñ me nga jô ésaa wome na: Nge ma bo te bulane nye be wo, ma ye beʼe mekua e be ésaa wom nnôm éto! 33Eyoñe ji, ma yeʼelane wo: Mbo ésaé wôé a likiʼi, éjiane mongô, ane *ôlo masa wom, a na mongô a betek a bobenyañe béé. 34Ma ye bete be ésaa wom aya, nge mongô a nji bo a ma? Aa! Mise mam me boʼo te fombô bidime bia ye kui be ésaa wom!

Bible en langue Bulu

© LʼAlliance Biblique du Cameroun, 2007

More Info | Version Index