Μορφή αναζήτησης

Ebavevuvu 49

Iyakobo yana vona anaebalauyabu natunavo wagaidiya.

1E ada Ifeleimu ke Manasa adiawanuwakabubu muline, au Iyakobo natunavo matatabuna gidouwe-vagauwidi ielai wagaine ada givona, “Imi natukuweyavo, wana miyafifiku e aku gana ifufuyemi aimo gavana gina yegemo wagaimiya tova ielaelai wagaidiya faine. 2“Wana vagauta ada wana nogala. Iya tamami Isileli wana vanenegeku.”

3E ada natuna Lubeni givonenaga,

“O Lubeni yaku tomoinagona, yaku toyogina

anaiyaiyaya nagona. Oye ayegana ke ya toyogina

ani tubuiyamomo adiyegana ke yadi

toyogina gitubusegedi.

4Aku oyeni ya dewa anafaiweya buli giluvilavilana

ada keke una vetowainagona taimomo wagaidiya,

faina ulaka akuivi wagaine ke ukivebwanenena.

5“Simiyoni ke Livai, yami dewa anaita seyana,

amiselu yami benisi wagaidiya dayaga wakivemaduna.

6Iya keke gadaavi yami venuwadadana kavu wagaine

ada keke gadaluku yami vagauta wagaine,

faina yami nuwakoyo wagaine kaliva waluvealikadi,

ada bulumakau ageweduwedudi watala-kavovodi

yami nuwanuwa anafaiweya.

7Amialatabutabu faina yami nuwakoyo lakaina,

ada yami nuwakoyo wagaine wakiveuloulolo

toyogi-vagaina! Yami tubudelideliyavo

gana vebiawawalidi ke ina awala inanau Isileli

yana unuma wagaidiya.

8“Yuda, tubuiyamomo ina davani ke ina oduodu

wagainiya faina nibaimomo una kikiododi.

9Oyeni anafaiweya laiyoni natudi giyewa

anakevakeva gimunuga wagaine-deya.

Natuku, oyeni anafaiweya laiyoni gienobala

gidaudau, aku keke seyana gaito wayana

asevatu gina livagu.

10Kini anaveimeya anaaiwala keke gina miyasege

analaba toni veimeya velemoena ginaelai.

Ada yoo tulina tulina babi matatabuna wagaine

yadi takesi ina aliyedi wagaine ada

banae ina oduvemoimoinena.

11E ada maliya lakaina faina gileifi

gina yoyotavutavuna ke anafata wadedeku

lagadi wagaidiya yana doniki gina luifona

e ada gileifi-nai guwana wagaine gina kanikani

aku keke gina venuwaegege.

Banae ani anafaiweya aimo ananuya gina koladi

waini wagaine, ananuya manamanawena

gina kolana gileifi vutona wagaine,

faina waini lakai-vagaina, maliya lakaina

e ada keke gina venuwaegege.

12Matana gina luyabela anafaiweya waini yana

yabeyabela, nigona inakwaya anafaiweya

miliki yana kwayakwaya.

13“Sebuloni, unamiya taliya lilivane, ada ya fafali iwakana

ke niwaniwalovine waka lakaidi yadi ebaluku.

Ya etonaba ginanau Saidoni waina.

14“Isaka, oyeni anafaiweya doniki toyogina,

aku doniki-nai gikabekabebena ada yana

veinuwana luwei nefanidiya gienobala.

15Ada yana ebaveyawai anaebaga iwaka-vagaina

ada yana fafali iwaka-vagaina gina itana, au

domona maita ginaobu aku vita ina abulakaina

tabone. Ada gina vetogugai yogoyogona.

16“Dani, tauni ya kalivayavo una veimeyedi anafaiweya

Isileli anaunuma seyana. 17Oyeni aimo

anafaiweya mota wai lilivane, anafaiweya

mota manimaninina gidaudau wai wagaine.

Ada osi wa anatovemadu ginaelai ada mota-nai

osi ageweduweduna gina yovana, e ada

anatovemadu gina awaine wamuline ginabeu.

18“O Yaubada, ya kibababala gabodana.

19“Gada, aimo tobaninivula adiyoo tufona inaela

inamununi, aku unatafidi ke una vemaduwawaliyedi.

20“Aseli, oyeni aimo aa uveta una avetavetala

kini analauboda ginakani.

21“Nefitalai, oyeni anafaiweya diya vavine ietoyavuna.

Ada una venatuna, natumomo aiwaka founa.

22“Yosefa, oyeni anafaiweya ai lagana iyoyo tavutavuna.

Ai-nai gufa tovoga lilivane, ada lagana itabo iyegemo

ke melala anakali itabo-tagona.

23Fewa anabiyavo ilugaviyani toyogina, venibaineya

tufi itugagedi wagainiya. 24Aku ya fewa

ukivevatu-moena, nima ukivetoyogina. Oyeni

ya toyogina uvaina Iyakobo yana Yaubada

Totoyogi-vagaina wagaine-deya, kaduwe ivewagana

meIsileli yada Toitaveyabina ke yada Toyogina.

25Faina yaku Yaubada Banae gilemelemeni.

Banae Totoyogi-vagaina giawaawanuwakabubuyeni.

Giawaawanuwakabubuyeni wei wagaine gabama

getane-deya, ke giawaawanuwakabubuyeni

gufa wagaine babi dibune tovoga wagaidiya-deya.

Giawaawanuwakabubuyeni ke vavinemomo

biyabiyama moyaidi ivenatunedi, ada kaduwe

giawaawanuwakabubuyeni ke ya kevakevayavo

natudiyavo evagudi moyaidi ivenatunedi. 26Iya

akuawanuwakabubu itubusegena oya anagaitoma

iwakadi miyamiyani-vagaidi, ada ginanau oya

tuwaidi anaebalauyabu-mowa wagaidiya.

Taidei awanuwakabubu-dina inaelai wagainiya Yaubada

wagaine-deya, oyeni tonagona atubulugamomo wagaidiya.

27“Beniyamina, oyeni anafaiweya seyana galuweta

walawalaa mafalavulavugina. Malabutuya

anakevakeva gina munuga gina kanikani,

lavilavi gavana givaina gina vutuvutuga.”

28Taidei biyavo-dina matatabudi badiyavo Isileli unumina tuwelo, ada taidei anafaiweya tamadi givonedi tova-nai giawanuwakabubuyedi. Natunavo seyana seyana anaawanuwakabubu givelena analauboda wagaine.

Iyakobo yana alika.

29Ada Iyakobo natunavo adituwelo giawanuwakabubuyedi muline, adiveimeya giveledi, givonediga, “Tova kabisona yawaiku ginaavaina ke gananau yaku gabumomo toalika wagaidiya. E ada wanawaiku wanayeweku fafali Kenani ke wana tavuku kamakuweyavo nodi kabala luwa wagaine tainei Efiloni banae Itaiti anaunuma yana babiya. 30Luwa-nai Makapila gimiyamiya, Mamele lilivane Kenani wagaine. Wada tuwaina Ebelaamo gikimone tamwaina babi nodi Efiloni bana Itaiti unumina wagaidiya-deya ke luwa-nai gina vedidikula. 31Ada wadedeku Ebelaamo ke vavinena Sela nodi itavudi, ada kaduwe wadedeku Aisake ada vavinena Libeka itavudi, ada wadedeku iya Leya gatavudi. 32Tainei faina iya kaduwe wadedeku wana tavuku. Babi-nai ada luwa wagaine bademowa kimokimonena Itaiti natunavo wagaidiya-deya.”

33Ada Iyakobo yana vona giluyabuna natunavo wagaidiya, au agena giselakaidi ivi wagaine ada yala gisegena ke yawaina giavaina.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index