Μορφή αναζήτησης

Wel 4

Tice me Jolebi me Ekeko ka Kokat

1Rwot oko waco ne Musa kede Aaron be, 2“Marunu jo me ekeko ka Kokat, di lubere kede joakwari gi kede miere gi, 3cako kibut jo me mwakini ot adek me dongo tuno i mwakini ot kany, gin en jo kame twero timo tic amakere kede Eema me ariamakin keda. 4Tic me jo ka Kokat i Eema me ariamakin keda makere kede jamini kacil.

5“Kame kare otuno me dako kimere, Aaron kede awobe mege bino gonyo esuka kame galao kakame Sanduku me Isikan tie iye, di gin kiko umo Sanduku kede egoe nono. 6Di do kiko bino medo ume kede del apwot, di kiko ume kede egoe ebululu ebululu, di kiko rwako ne atekai me yene.

7“Gin kibino peto egoe ebululu ebululu i wi emesa kame koketo iye mugati kame koyalo ne Rwot, di kiko keto iye suanin, itatany me dunyo odok angwe kur, kalayan, jagin me giayala amata, kede do mugati me nakanaka. 8Di do gin kiko bino umo gi kede egoe akwar, di kiko medo ume kede del apwot di kiko rwako ne atekai me yene.

9“Gin kibino kwanyo egoe ebululu ebululu di kiko umo kede gicibo etala, kede italan mege, kede gime kepo wi ausin mege, itatany mege, kede kakame kopiko iye mo. 10Gin kiko bino medo bono gi kede del apwot di kiko cibe i kom yen kame koguro me yeno gi.

11“Alubo mere gin kibino yaro egoe ebululu ebululu i wi alutari kame kotimo kede saabu, di kiko medo ume kede del apwot, di kiko rwako ne atekai me yene. 12Gin kibino kwanyo jamini dedede kame kotio kede gi i Kabedo Kacil di kiko bono gi kede egoe ebululu ebululu, di kiko medo umo gi kede del apwot di kiko keto gi i kom yen kame koguro me yeno gi. 13Gin kibino kwanyo buru ki wi alutari, di kiko ume kede egoe akwakwar. 14Di kiko bino keto iye jamini dedede kame kotimo kede tic i wi alutari, kame ribo itatany me kwanyo buru aliet, ilumai, gi me kikiso wi alutari, kede kalayan. Di do kiko bino medo ume kede del apwot di kiko rwako atekai me yene. 15Kame kare me dako kimere otuno, jo me ekeko ka Kokat bino yeno jamini kame kotio kede gi me wora ingei Aaron kede awobe mege tieko bono gi kiber. Jo ka Kokat nogo likame poore mulo jamini kame kotio kede gi me wora, aso ka li kibino to.

“Magonogi en obedo tice me jo me ekeko ka Kokat i kabedere dedede kame kobino kobo iye Eema.

16“Eleasar wot ka Aaron bino bedo ngat kame lo Eema dedede kede mo me italan, kede odok angwe kur, kede giamia me alos, mo me wir kede jamini dedede kame tie i Eema kame kotieko kwero buta.”

17-20Rwot oko meede kede yamo but Musa kede Aaron be, “Jo me ekeko ka Kokat likame poore noko akadi neno jamini kame kotio kede gi me wora, tuno di Aaron kede awobe mege kong ber oumo jamini nogo. Aso ka li, gin kibino to dedede kikom Jolebi. Pi manono, Aaron kede awobe mege en kame bino donyo kede gin i yi Eema di kiko waco negi gikame ngat acelacel kikom gi poore timo.”

Tic ka Jolebi me Ekeko ka Gereson

21Rwot oko waco ne Musa be, 22“Mar wel jo me ekeko ka Gereson, di lubere kede joakwari gi kede miere gi, 23cako kibut jo me mwakini ot adek me dongo tuno i mwakini ot kany, gin en jo kame twero timo tic amakere kede Eema me ariamakin keda. 24Tic gin bino bedo yeno gigi: 25gin kibino donyo yeno isukan kame poko yi Eema, aum mere me ooko, kede aum me del apwot kame kodokakino i kom manono, kede egoe me galao ekeko mere, 26kede isukan aluko diakal mere, kede egoe agalao kadonyo i diakal mere, kede jamini dedede me twetweo kede dudupo gi nogi. Gin kibino timo tice dedede amakere kede gi nogi. 27Aaron kede awobe mege bino neno be tice nogi dedede jo ka Gereson otimo, doko kiko lubo gi dedede kame gin kibino waco negi. 28Magonogi en obedo tic me jo me ekeko ka Gereson amakere kede Eema me ariamakin keda; Itamar wot ka Aaron ngasaseredoti en kame bino bedo neno be jo otimo tice nogi.”

Tic ka Jolebi me Ekeko ka Merari

29Rwot oko waco ne Musa be, “Mar wel jo me ekeko ka Merari, di lubere kede joakwari gi kede miere gi, 30cako kibut jo me mwakini ot adek me dongo tuno i mwakini ot kany, gin en jo kame twero timo tic amakere kede Eema me ariamakin keda. 31Tic gin bino bedo yeno ibaon, atekai, ipirin kede agangeta me Eema, 32kede yeno ipirin, agangeta, loce, aunoi kede jamini dedede amakere kede gero diakal aluko Eema. 33Magonogi en obedo tic me jo me ekeko ka Merari amakere kede Eema me ariamakin keda; Itamar wot ka Aaron ngasaseredoti en kame bino bedo neno be jo otimo tice nogi.”

Maro Wel me Jolebi

34Aso Musa kede Aaron kede jotel me Isirael oko maro wel me jo ka Kokat, di lubere kede joakwari gi kede miere gi, 35cako kibut jo me mwakini ot adek me dongo tuno i mwakini ot kany, jo dedede kame twero timo tic amakere kede Eema me ariamakin kede Rwot. 36Di wel gin dedede di lubere kede ikekon ka joakwari gi oko tuno tutumia are kede tol kanyaare kede ot kany (2,750). 37Manoni en obedo wel me jo me ekeko ka Kokat di lubere kede ikekon ka joakwari gi, jo kame oudo poore tic i Eema ka Rwot, gin jo kame Musa kede Aaron oudo owandiko di lubere kede cik ka Rwot.

38Jo me ekeko ka Gereson, di lubere kede joakwari gi kede miere gi, 39cako kibut jo me mwakini ot adek me dongo tuno i mwakini ot kany, jo dedede kame twero timo tic amakere kede Eema me ariamakin kede Rwot, 40wel gin dedede di lubere kede ikekon ka joakwari gi oko tuno tutumia are kede tol kanyape kede ot adek (2,630). 41Manoni en obedo wel me jo me ekeko ka Gereson di lubere kede ikekon ka joakwari gi, jo kame oudo poore tic i Eema ka Rwot, gin jo kame Musa kede Aaron oudo owandiko di lubere kede cik ka Rwot. 42Jo me ekeko ka Merari, di lubere kede joakwari gi kede miere gi, 43cako kibut jo me mwakini ot adek me dongo tuno i mwakini ot kany, jo dedede kame twero timo tic amakere kede Eema me ariamakin kede Rwot, 44wel gin dedede di lubere kede ikekon ka joakwari gi oko tuno tutumia adek kede tol are (3,200). 45Manoni en obedo wel me jo me ekeko ka Merari di lubere kede ikekon ka joakwari gi, gin jo kame Musa kede Aaron oudo owandiko di lubere kede cik ka Rwot. 46Jo dedede kame Musa kede Aaron kede jotel me Isirael oko wandiko, di lubere kede joakwari gi kede miere gi, 47cako kibut jo me mwakini ot adek me dongo tuno i mwakini ot kany, jo dedede kame twero timo tic amoto yeno jamini amakere kede Eema me ariamakin kede Rwot, 48wel gi oko tuno tutumia kanyauni kede tol kany kede ot kanyauni (8,580). 49Musa bin oko maro wel gin dedede di lubere kede cik ka Rwot, di eko popoko negi epone me timo tic i Eema amoto me yeno jamini amakere kede.

Baibuli I Leb Kumam

© 2013 Bible Society of Uganda

More Info | Version Index