Μορφή αναζήτησης

NÚMEROS 6

Nazareo runa imata ruhuanamanta

1Mandac Dios Moisesta rimashpaca: 2«Israelcunamanta cari cashpa, huarmi cashpapish nazareo tucushpa, ñucapaclla chicanyachishca cashpaca, 3vinotapish, machana yacutapish, jayac vinotapish, jayac machana yacutapish, uvas capishca yacutapish mana ubianachu can. Pucushca uvastapish, chaquishca uvastapish mana micunachu can. 4Ima punzhacaman nazareo tucushca pactangacamanmi uvas chagramantaca uvas muyutapish, uvas caratapish mana micuna can.

5Ima punzhacaman nazareo tucushca pactangacamanmi acchata mana pitina can. Nazareo tucushpa, Diospaclla chicanyarishca punzhacuna pactangacamanmi jucha illac canga, shinallatac acchatapish huiñachun saquina can. 6Mandac Diospac chicanyarishca punzhacunapica huañushcapi mana tuparinachu can. 7Diospaclla chicanyachishca cashcata acchapi apashca cashcamantaca paipac taita cacpipish, mana cacpipish, huauqui cacpipish, pani cacpipish, huañushcapi tuparishpa, mana mapayanachu can. 8Nazareo tucushca tucui punzhacunami Diospaclla chicanyachishca cana can.

9Maijan cashpapish cungailla paipac cuchupi huañucpi, tuparishpa Diospaclla cashcata ricuchic uma acchata mapayachishpaca, chuyayana punzhapimi acchata rutuchina can. Chaitaca canchisniqui punzhapimi ruhuana. 10Ña pusac punzhapica, ishcai urpita, mana cashpaca ishcai llullu palomata Dios-huan tupana huasi yaicunapi curaman cuchun. 11Chaipimi curaca shuctaca huañushcapi tuparishpa juchallishcata pichachun, cutin shuctaca Diosman cushpa tucui rupachinga. Chashna ruhuashpami paipac acchataca cutinllatac Diospaclla cachun huiñachi callaringa. 12Chai quipaca cutinmi nazareo tucushpa, Diospaclla chicanyarishpa causai callaringa. Chaipacca shuc huatayuc ima mana tucushca cari ovejatami huañushcapi tuparishpa juchallishcata pichachun Diosman cunga. Pai mapayashcamantaca ñaupa punzhacunapi nazareo tucushcaca yangami saquiringa.

13Nazareo tucushca punzhacuna pactacpica, chai nazareoca cai mandashcacunatami ruhuana can. Dios-huan tupana huasi yaicunaman shamushpami, 14Mandac Diosmanca shuc huatayuc ima mana tucushca cari ovejata tucui rupachichun cunga. Cutin ima mana tucushca shuc huarmi ovejataca juchata pichachun Diosman cungapac, ima mana tucushca cari ovejataca Dios-huan alli tucungapacmi cuna can. 15Chaipac jahuapica shuc uchilla tazapi ñuto harinahuan aceitehuan ruhuashca levadura illac tortata, levadura illac galletata aceitehuan chapushpami apamuna can. Chashnallatac granotapish, tallina vinotapish apamuna can.

16Chaicunataca curami Mandac Diospac ñaupapi juchata pichachun cunga. Chashnallatac Diosman cushca tucui rupachina animaltapish rupachingami. 17Dios-huan alli tucungapacca cari ovejatami levadura illac taza tortahuan cuna can. Curallatacmi granotapish, tallina vinotapish cuna can.

18Chai quipaca nazareo tucushca runami Dios-huan tupana huasi yaicunapi acchata pitinga. Chaimantaca Dios-huan alli tucungapac Diosman carashcata rupacuc nina ucupimi churanga. 19Diospaclla cashcata ricuchic acchata pitishca quipaca curami cari oveja rigra aicha yanushcata levadura illac tortata tazamanta japishpa, levadura illac galletatapish nazareo tucushca runapac maquipi churanga. 20Chaicunataca curallatacmi Mandac Diospac ñaupapi cuyuchishpa Diosman cunga. Chaicunaca Diospaclla chicanyarishca cashcamantami curapaclla canga. Diospac ñaupapi cuyuchishpa cushca pecho aichapish, alzashpa Diosman cushca rigra aichapish curapacllami canga. Chai quipami nazareo runaca vinota ubianga.

21Caicunami nazareo tucushpa, Mandac Diosman ima shina cuna cashcataca ruhuanaca. Caicunapac jahuapi imata ashtahuan cusha nishpaca cunallami. Diospaclla tucushpa imatapish ruhuasha niccunaca nazareocunata imata ruhuachun mandashca shinallatacmi tucuita ruhuana can» nirca.

Curacuna bendiciashcamanta

22Mandac Dios Moisesta rimashpaca: 23«Aaronpish, paipac churicunapish rimashpaca:

24“Mandac Dios bendiciashpa

punzhanta cuidachun.

25Mandac Dios cuyashpa cushichichun.

26Mandac Dios cushi causaita cuchun

nishpa israelcunata bendicianguichic”

nishpa mandarca.

27Ñuca shutipi israelcunata bendiciacpimi, ñucapish paicunataca bendiciasha» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index