Μορφή αναζήτησης

2 Samuel 23

Davidpa pedee jarada piui naaweda

1Jai–idaai naaweda Davidpa nãgɨ́ pedee jaraji:

‘‘Isaí warra David, Tachi Akꞌõrepa waibɨa papida; Jacob Akꞌõre Waibɨapa rey jɨrɨtꞌerada; Israeldepema kꞌari pi–ia kꞌaridapa; mãgɨpa nãga jara bɨ:

2‘Mɨ pari Tachi Akꞌõre Jaure pedeeji. Iru pedee mɨmaa jarapiji. 3Israelitaarã–itꞌee ãchi Akꞌõre Waibɨa mãu choma bɨkꞌa bɨ, ichia ãra jɨ̃apari perã. Iruata mɨmaa nãga jaraji:

’Chi reypa eperãarã ichi jua ekꞌari pꞌanɨɨrã pia akꞌɨpari Tachi Akꞌõre waawee bapari perã, nãga baitꞌee. 4Kꞌoi chepꞌeda, pajã ewaraa kꞌobeekꞌãri, akꞌõrejĩru pi–ia urua cheparikꞌa pꞌũajara pia tꞌonomerã, mãga pɨkꞌa ma eperãarã akꞌɨpari pi–ia baitꞌee.’

5”Mãgá Tachi Akꞌõrepa mɨdeepa uchiadaitꞌeerã ichita pia akꞌɨ bapariitꞌee. Mɨ ome irua pacto ooji mãikꞌaapa ichita ooitꞌee ichia jaradakꞌa. Irua mɨ ichita kꞌaripaitꞌee mãikꞌaapa mɨmaa oopiitꞌee mɨa ne–inaa pia oo kꞌinia bɨkꞌa. 6Mamĩda ne–inaa kꞌachia ooyaa pꞌanapataarã kꞌaripa–e paitꞌee. Ne–inaa kꞌachia ooyaa pꞌanapataarã ne–ɨɨrɨ́kꞌapɨ pꞌanɨ. Ne–ɨɨrɨ batꞌapatakꞌa servi–e bairã, mãga pɨkꞌa mãɨrã jõdaipia bɨ servi–e pꞌanadairã. Ne–ɨɨrɨ jitadakꞌaa pꞌanɨkꞌa tachi awadarii perã, mãga pɨkꞌa mãɨrã ome taarã nipadakꞌaa kꞌachia pꞌanadairã. 7Eperãarãpa mãgee ne–ɨɨrɨ jitadaitꞌee pɨrã, tꞌõbaidai kꞌãyaara, ne–inaa hierrodee oodapa wa miasupa jitapata. Mãpai tꞌɨpɨtaude batꞌakꞌoopata paa jõdaimerã.”

David soldaorã chõo kꞌawaara pꞌanadapꞌedaa

(1 Crónicas 11.10-47)

8David soldaorã chõo kꞌawaara pꞌanadapꞌedaarã õpee paji. Tacmonita Joseb Basébet awaraa sõcharra beerã omé poro waibɨa paji. Chõoda abaade irua ochocientos ɨmɨkꞌĩraarã peeji miasupa.

9Ma sõcharra beerã õpeedepema awaraa ajojita Dodó warra Eleazar paji. Iru David ome nipaji Pasdaminde, filisteorã chõo chedakꞌãri mãikꞌaapa israelitaarã ãpɨtee jëredakꞌãri. 10Mamĩda Eleazar ãpɨtee wã–e paji. Chõomaa beeji mãikꞌaapa filisteorã soldaorã peemaa beeji, ichi jua tꞌũmaadarumaa espada jita bɨpa. Iru kꞌaurepa ma ewate Tachi Akꞌõrepa israelitaarãmaa pꞌoyaapiji. Iru mãgá chõoda tꞌẽe israelitaarã irumaa chejida mãikꞌaapa ãchi kꞌĩra unuamaa iru pꞌanapatapꞌedaarã netꞌaa jãri atajida.

11Ma sõcharra beerã õpeedepema ichiaba paji ararita Agué warra Sama. Filisteorã chipꞌedaidakꞌãri Lehide, eperãarãpa lenteja uudapꞌedaa eujãde, israelitaarã soldaorã jĩchoojida ãchi naa. 12Mamĩda Sama beeji ma ne–uu eujãde mãikꞌaapa chõoji ma filisteorã pꞌoyaarumaa. Mãgá Tachi Akꞌõrepa israelitaarãmaa pꞌoyaapiji.

13Maapai treinta sõcharra beerã David jua ekꞌari pꞌanapachida. Ewari aba israelitaarãpa ãchia ne–uudapꞌedaa ewadakꞌãri, ma treintadepema soldaorã õpee ununajida David ome Adulán mãu tede. Maapai filisteorã soldaorã ãchi carpa eebai iru pꞌanajida Refayin eujã jewedaade. 14David eede ɨtꞌɨ́ baji ichi soldaorã miru chipꞌedapꞌedaamãi. Jõdee filisteorã soldaorã chokꞌara Belén pꞌuurude ãchi soldaorã pꞌanapatapꞌedaamãi pꞌanajida. 15Ma sõcharra beerã David eere pꞌanadapꞌedaa iru kꞌaitꞌa pꞌanɨde, tꞌãri araa bada perã ichi tꞌoruweda pꞌuuru Belén ome, Davidpa mãgaji:

—¡Pia bakꞌajida aji, apidaapa pania Belén pꞌuurudepema puerta kꞌaitꞌa bɨ pozodepema mɨmaa teeda paara toitꞌee!

16Mãga ũridakꞌãri, ma sõcharra beerã õpee mama pꞌanadapꞌedaarã wãjida Belén pꞌuurudee mãikꞌaapa filisteorã ome chõomaa pꞌaneejida panarutamaa ma pꞌuurudepema puerta kꞌaitꞌa bada pozode. Pania joi atadapꞌeda, Davidmaa ateejida. Mamĩda tee chedakꞌãri, Davidpa to kꞌinia–e paji. Ma kꞌãyaara Tachi Akꞌõre–itꞌee eujãde weeji.

17Mãgaji:

—Na pania to–eda aji. ¡Toda paara, na sõcharra beerã waa to pɨkꞌa bakꞌaji, ãra piukꞌajida perã na pania atadapꞌedaa kꞌaurepa! ¡Mɨa to kꞌinia–epɨ!

Ma sõcharra beerã õpee mãgee ne–inaa oopachida.

18Sarvia warra mãikꞌaapa Joab ɨ̃pema, Abisay ma treinta soldaorã sõcharrara beerã poro waibɨa paji. Chõoda abaade irua trescientos kꞌĩra unuamaa iru pꞌanadapꞌedaarã ɨ̃rɨ wãpꞌeda, peekꞌooji miasupa. Maperã ma treinta sõcharrara beerãpa iru tꞌo pꞌanajida. 19Ichiaba maperã iru ãchi poro waibɨa beeji. Mamĩda atꞌãri ma sõcharra beerã õpee iru kꞌãyaara piara tꞌo pꞌanajida.

20Awaraa Israel eerepema soldao sõcharra badapa ne–inaa chokꞌara ooji. Mãgɨ́ Cabsel pꞌuurudepema Joyadá warra Benaías paji. Ichia Moabdepema chõo kꞌawaa beerã omé peeji. Ichiaba ewari aba nieve baai nɨ̃bɨde, iru yooro te uriade tꞌĩupꞌeda, león peeji. 21Ichiaba irua Egiptodepema audú ɨtꞌɨa bada peeji. Mãgɨpa miasu anipaji mĩda, Benaiapa ma Egipto pida ɨ̃rɨ wãji pakꞌurupa mãikꞌaapa iru miasu jãri atapꞌeda, peeji. 22Ma jõma ooda kꞌaurepa, awaraa sõcharra beerã ma treintadepemaarãpa Benaías tꞌo pꞌanajida. 23Mamĩda atꞌãri ma sõcharra beerã õpee iru kꞌãyaara piara tꞌo pꞌanajida. Davidpa Benaías bɨji ichi jɨ̃apataarã poro waibɨa pamerã.

24Ma treinta soldaorã sõcharrara beerã nãgɨɨrã paji: Joab ɨ̃pema, Asael; Belén pꞌuurudepema Dodó warra, Eljanán; 25Jarod pꞌuurudepema, Sama awaraa Jaroddepema Elicá ome; 26Bet Palet pꞌuurudepema, Heles; Tecoa pꞌuurudepema, Iqués warra Ira; 27Anatot pꞌuurudepema, Abiezer; Jusá pꞌuurudepema, Mebunay+ ; 28ajojita, tꞌɨ̃jarapatapꞌedaa Zalmón; Netofa pꞌuurudepema, Maray; 29awaraa Netofadepema, Baná warra Jéled; Benjamín ëreerãdepemaarã eujãde bada Guibeá pꞌuurudepema, Ribay warra Itay; 30Piratón pꞌuurudepema, Benaías; Gaas kꞌaitꞌa bada to chakꞌe pꞌoo bɨdepema, tꞌɨ̃jarapatapꞌedaa Hiday; 31Arbá pꞌuurudepema, Abí Albón; Bajurín pꞌuurudepema, Azmávet; 32Salbón pꞌuurudepema, Elijaba; Jasén warrarã; Jonatán 33ararita, tꞌɨ̃jarapatapꞌedaa Sama warra; awaraa ararita, Sarar warra Ahían; 34Macá pꞌuurudepema, Ajasbay warra Elifelet; Guiló pꞌuurudepema, Ajitofel warra Elián; 35Carmel pꞌuurudepema, Jezró; arbita, tꞌɨ̃jarapatapꞌedaa Paray; 36Sobá pꞌuurudepema, Natán warra Igal; Gaddeepa uchiada, Hagrí warra Baní; 37amonita, tꞌɨ̃jarapatapꞌedaa Sélec; Berotdepema, Najaray. Mãgɨ́ Sarvia warra Joab escudo anipapari paji. 38Ichiaba ma treintadepema paji itrita, tꞌɨ̃jarapatapꞌedaa Ira; awaraa itrita, Gareb 39mãikꞌaapa hitita, tꞌɨ̃jarapatapꞌedaa Urías. David jua ekꞌari sõcharra beerã jõmaweda treinta y siete paji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index