Μορφή αναζήτησης

Éxodo 4

Tachi Akꞌõrepa Moisemaa ne–inaa unupida

1Mamĩda Moisepa mãgaji:

—Israelitaarã poro waibɨarãpa ijãada–e paitꞌeeda aji, mɨa mãga jarakꞌãri. Ma kꞌãyaara jaradaitꞌee: “Tachi Akꞌõrepa ichi pɨmaa unupi–e paji.”

2Mãpai Tachi Akꞌõrepa iidiji:

—¿Kꞌãata pɨchi juade iru bɨma? aji.

Moisepa pꞌanauji:

—Oveja akꞌɨpari pakꞌuruta iru bɨda aji.

3Tachi Akꞌõrepa mãgaji:

—Eujãde batꞌatꞌaapáde aji.

Moisepa batꞌatꞌaakꞌãri, taama padachi. Ma taama unukꞌãri, waaweepa Moisés pꞌiradachi.

4Mamĩda Tachi Akꞌõrepa mãgaji:

—Chi trude jita atapáde aji.

Chi trude jita atakꞌãri, oveja akꞌɨpari pakꞌuru padachi.

5Mãpai Tachi Akꞌõrepa mãgaji:

—Mãga óoji ijãadamerã mɨ, ãra chonaarã Abraham, Isaac mãikꞌaapa Jacob Akꞌõre Waibɨapa pɨmaa unupida. 6Ɨ̃rá pɨchi jua tꞌũamãi tꞌɨpáde aji.

Moisepa ooji Tachi Akꞌõrepa jaradakꞌa. Ichi jua ẽtꞌa atakꞌãri, lepra kꞌayaapa tꞌo–tꞌoo baji nievekꞌa.

7Mãpai Tachi Akꞌõrepa mãgaji:

—Waya pɨchi jua tꞌũamãi tꞌɨpáde aji.

Moisepa ooji Tachi Akꞌõrepa jaradakꞌa. Ẽtꞌa atakꞌãri, ichi jua aɨ naawedapemakꞌa baji.

8Mãpai Tachi Akꞌõrepa mãgaji:

—Ma naa unupida ãra kꞌĩrapite oonakꞌãri, ijãada–e pɨrã, chi tꞌẽepemata ijãadai. 9Mamĩda ma omeeweda ijãada–e pɨrã, pania joi atáji Nilo todepema mãikꞌaapa eujãde weetꞌáaji. Mãga ookꞌãri, waa padariitꞌeeda aji.

10Mamĩda Moisepa pꞌanauji:

—Aai, Tachi Akꞌõre, mɨ pia pedeekꞌaa. Mɨ tꞌoruweda mɨ pi–ia pedeekꞌaada aji.

11Mamĩda Tachi Akꞌõrepa mãgaji:

—¿Kꞌaipa eperãarã itꞌai oojima? ¿Kꞌaipa eperãarã pedee atuapiparima maa–e pɨrã kꞌɨɨrɨ kꞌisuapiparima? ¿Kꞌaipa eperãarã tau pia unupiparima maa–e pɨrã tau pꞌãriupiparima? ¿Mɨ, Tachi Akꞌõrepa mãga oopari–ekꞌã? 12Wã́ji. Mɨa pɨ pia pedeepiitꞌee. Ma awara mɨa jarapi kꞌinia bɨ pɨmaa jarateeitꞌeeda aji.

13Mamĩda Moisés wã kꞌinia–e baji. Mapa mãgaji:

—Aai, Tachi Akꞌõre, mɨ chupɨria kꞌawáaji. Mɨ kꞌãyaara awaraata pëipáde aji.

14Maperã Tachi Akꞌõre kꞌĩraudachi Moisés ome mãikꞌaapa mãgaji:

—Pɨ ɨ̃pema Aarón aukꞌa Levideepa uchiada. Mɨa kꞌawa bɨ iru pi–ia pedeepari. Iru pɨ kꞌĩrachuude cheru mãikꞌaapa o–ĩadariitꞌee pɨ unukꞌãri. 15Iru ome pedéeji mãikꞌaapa jaráji jõmaweda irua tꞌẽepai jaramerã. Parã pedeedakꞌãri, mɨ parã ome baitꞌee. Jarateeitꞌee mɨa parãmaa oopi kꞌinia bɨ. 16Mɨa jarapi bɨkꞌa pɨa Aaronmaa jaraitꞌee mɨ pari mãikꞌaapa irua ma pedee israelitaarãmaa jaraitꞌee. 17Jãgɨ́ pakꞌuru pɨchi ome atéeji. Jãgɨpa ooitꞌeeda aji, eperãarãpa ne–inaa waide unudakꞌaa.

Moisés Egiptodee wãda

18Mãpai Moisés chi chãure Jetromaa wãpꞌeda, mãgaji:

—Mɨ wã kꞌinia bɨda aji, Egiptodee mɨ ëreerã akꞌɨde kꞌawaitꞌee chokꞌai pꞌanɨ wa piu pꞌanɨ.

Mãpai Jetropa mãgaji:

—Pia wãpáde aji.

19Moisés atꞌãri Madián eujãde bɨde, Tachi Akꞌõrepa irumaa mãgaji:

—Egiptodee wãpáde aji, pɨ peedaitꞌee pꞌanadapꞌedaarã piudapꞌedaa perã.

20Mãpai Moisepa chi wẽra chi warrarã ome bataupiji burro ɨ̃rɨ mãikꞌaapa Egiptodee wãjida. Ichi juade ateeji Tachi Akꞌõre pakꞌuru.

21Ode wãdade Tachi Akꞌõrepa Moisemaa mãgaji:

—Egiptode panakꞌãri, Faraón kꞌĩrapite mɨa jaradakꞌa óoji ne–inaa eperãarãpa pꞌoyaa oodakꞌaa ãchi juadoopa. Mamĩda mɨa iru kꞌɨɨrɨ kꞌisuapiitꞌee israelitaarã uchiapinaamerã. 22Iru mãga beekꞌãri, nãga jaráji: “Tachi Akꞌõrepa nãga jara bɨ: ‘Israelitaarã mɨ warra naapemakꞌa bɨ, ãra jɨrɨtꞌerada perã. 23Ãra pëipáde a bɨ, mɨmaa ɨtꞌaa tꞌɨ̃nadamerã maa–e pɨrã mɨa pɨ warra naapema peeitꞌee.’ ”

24Moisés ichideerã ome ode wãdade kꞌeu wãkꞌãri, ãchi carpa eebai jira bɨjida. Mama pꞌanɨde Tachi Akꞌõrepa Moisés peetꞌaaitꞌee paji. 25Mapa chi wẽra Seforapa lowero mãudee ooda atapꞌeda, chi warra kꞌapꞌɨade tauchaa bɨji. Maapꞌeda chi warra me epa Moisés bɨɨrɨ tꞌõbaiji mãikꞌaapa mãgaji: “Na waa batꞌada kꞌaurepa pɨ atꞌãri mɨ kꞌima paitꞌeeda” aji. 26Seforapa mãga jaraji chi warra kꞌapꞌɨade ma tauchaa bɨda perã Tachi Akꞌõrepa ichi kꞌima piupinaamerã.+ (Génesis 17.12) Maapꞌeda Tachi Akꞌõrepa Moisés wãpiji.

27Moisés Egiptodee mãgá wãrude, Tachi Akꞌõrepa Aaronmaa mãgaji: “Wãpáde aji, pania wẽe bɨmaa Moisés kꞌĩrachuude.” Aaronpa ooji Tachi Akꞌõrepa jaradakꞌa. Unujida Tachi Akꞌõre ee apatade. Kꞌĩra ɨ̃jida ãrapa saludaadakꞌãri oopatakꞌa. 28Mãpai Moisepa Aaronmaa jaraji jõmaweda Tachi Akꞌõrepa jarada mãikꞌaapa ichimaa unupida. 29Mãpai ãchi omeeweda wãjida israelitaarã poro waibɨarãmaa. 30Aaronpa nepɨrɨji Tachi Akꞌõrepa Moisemaa jarada mãikꞌaapa ãchia akꞌɨpijida chi pakꞌuru taama padaipari mãikꞌaapa Moisés jua tꞌorroodarida lepra kꞌayaapa.

31Maperã israelitaarãpa ijãajida. Ũridakꞌãri Tachi Akꞌõrepa ãchi akꞌɨ bɨ mãikꞌaapa chupɨria kꞌawaa bɨ, bedabaidapꞌeda, Tachi Akꞌõremaa ɨtꞌaa tꞌɨ̃jida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index