Μορφή αναζήτησης

Exodus 34

Gali Yang ni Migid e Malang

(Deuteronomy 10:1–5)

1Me ga’ar SOMOL ngak Moses, “Mu th’ab l’agruw yang e malang ni bod fa gal yang nem ko som’on, mu gu yoloy fapi thin nga daken ni fa’ani immoy u daken fa gal yang nem ni kam bilig. 2Nge gabul ni kadbul ma kam mu’ i fal’eg rogom nga mub nga daken e burey ni Sinai ngad mada’gow u rom u p’ebugul e burey. 3Dariy be’ ni nge un ngom nga daken e burey; ma dariy be’ ni ngan guy u bang u daken e re burey nem; ma dariy ba saf ara ba garbaw ni ngan pag nge kay e pan u enggin e re burey ney.” 4Ma aram me th’ab Moses l’agruw yang i malang ni bod fa gal yang nem ko som’on, me yan i reb e rran riy nri kadbul me yan nga daken e burey ni Sinai nike fek fa gal yang i malang, nri bod rogon nike yog SOMOL ngak ni nge rin’.

5Me yib SOMOL nga but’ u fithik’ bang i manileng nge yib i sak’iy ngaram nga charen Moses. Me non Got nge yog fithingan nib thothup, ni ir fare SOMOL. 6Me th’ab SOMOL p’eowchen Moses me non ni ba ga’ laman ni ga’ar, “I Gag SOMOL, i gag ba Got ni gub sug ko murnguy mma kirban’ug, ma ba sowath ni gu ma damumuw ma gu ma dag e t’ufeg rog nib ga’ ma gub yul’yul’. 7Tin gu ma micheg e gu ma tay u gil’ ni bokum 1000 e mfen, ma gu ma n’ag fan u wan’ug e kireb nge denen rok e girdi’; machane dab gu pag ni dab ggechignag pifakay nge pifak pifakay nge mada’ ko bin dalip nge aningeg e mfen, ni bochan e denen nike ngongliy pi chitamangirad.” 8Me gurnag Moses ir nge paraw nga but’ nike tayfan SOMOL. 9Me ga’ar, “SOMOL, fa’anra rriyul’ ni gub fel’ u wun’um, ma gu be wenig ngom ni ngam un ngomad. Pi girdi’ ney e yad ba gel’an, machane wenig ngom mu n’agfan u wun’um e denen nge kireb romad, ngam pagmad nggu manged girdi’em.”

Fare m’ag nni be’echnag

(Exodus 23:14–19; Deuteronomy 7:1–5; 16:1–17)

10Me ga’ar SOMOL ngak Moses, “Bay gu ngongliy ba m’ag u thilig nge girdi’ nu Israel. Bay gu ngongliy e maang’ang u p’eowcherad ndawor ni ngongliy u fithik’ girdi’en reb e nam u faileng. Urngin e girdi’ ni yad be un ngom e bay ra guyed e n’en nrayag ni gu rin’, i Gag SOMOL, ya bay gu ngongliy ban’en ni yira ngat ngay ni fan ngom. 11Um fol ko fapi motochiyel ni bay gu pi’ ngom e daba’. Bay gu m’on rom nggu tuluf piyu Amor, nge piyu Kanaan, nge piyu Hitt, nge piyu Perez, nge piyu Hiv nge piyu Jebus ngar chuwgad. 12Ngar mu guy rogon ndab mu ngongliy ba tha’ u thilmed girdi’en e re nam ni ir e ngam man ngay, ya ir e ra girengiy e riya’ nga dakenam. 13Ya thingar mu buthug e pi altar rorad, ma ga kirebnag e pi malang ni kar suwegged ngalang nib machmach ma ga th’ab nga but’ e pi pow rok Asherah ni fare got ni bpin.

14“Dab mu tedfan yug reb e got, ni bochan e Gag SOMOL e dagurma k’adan’ug ko tagenging. 15Dab mu ngongliy reb e tha’ u thilmed girdi’en e re nam nem, ya nap’an ni yad ra tayfan e tirorad e got ma yad be pi’ e maligach ngorad, ma bay ra pininged gur ni ngam un ngorad, ma bay ur guyed rogon ni ngam koy e pi ggan ni kar og niged ko tirorad e got. 16Ma richey me le’engiy pifakam e ppin u rom, ngar waliyedrad nge dab ku ra yul’yul’gad ngog miyad un i tayfan e pi got rorad.-

17“Dab mu ngongliy e pi got ni wasey ngu’um tay farad.-

18“Thingar um ayuweg fare Madnom ko Flowa Ndariy e Is Riy. Ni bod rogon ni kugog ngom, thingar mu koy e flowa ni dariy e is riy ni medlip e rran ko pul ni Abib, ya lan e re pul i n’em e mu chuw u lan yu Egypt.-

19“Tin nganni’ i fakey ni pumo’on nge tin nganni’ u pifak e gamanman ni pumo’on e ba mil suwon ngog,- 20machane thingar mu chuw’iy e bin nganni’ i pifak e dongki rom ni ba saf e nge yan nga luwan ngan pi’ ni maligach, ma fa’anra dab mu chuw’iy nge sul ngom, ma thingar mu t’ar k’angan. Thingar mu chuw’iy nge sul ngom urngin e tin nganni’ e bitir ni pumo’on ni fakam.

“Dariy be’ ni nge yib nga p’eowcheg ndabi pi’ ban’en.

21“Nel’ e rran ni bay ni ngam rin’ e maruwel rom, machane dariy ba maruwel ni ngam rin’ ko bin medlip e rran, ni demturug ko nap’an ni yibe gi’ e but’ ara nap’an ni yibe t’ar wom’ngin e woldug.

22“Thingar um madnomnag e Madnom ko T’ar Wom’ngin e Woldug ko ngiyal’ ni ga be tabab i t’ar wom’ngin e tin som’on ko woldug rom ni wheat, mu kum ayweg fare Madnom ko Nochi Na’un ko tungun e duw, u nap’an ni ga be t’ar wom’ngin e woldug rom.-

23“Ra reb e duw ma dalip yay ni nge yib e pumo’on nu Israel nga p’eowcheg, i Gag SOMOL ni Got, ni fare Got rok piyu Israel. 24Ma tomuren ni kug tuluf girdi’en e pi nam ni yad bay ko gin ni ga be sor ngay mu gu ga’nag e gin ngam tafnay, ma dariy be’ nra guy rogon ni nge kol e nam rom ko ngiyal’ ni ba’aram nra reb e duw ma dalip yay ni nga mub nga p’eowcheg i Gag SOMOL ni Got rom.

25“Dab mu ognag ba flowa ni kan lith ni bay e is riy ni yagagen ba gamanman ni maligach ngog. Ma ku dab mu tay bang e ufin ko fare gamanman ni kan li’ ko fare Madnom ko Paluk’af nge af ko kadbul u reb e rran.-

26“Ra reb e duw ma dabisiy ni ngam fek i yib ko naun rok SOMOL e tin th’abi fel’ ko tin som’on i wom’ngin e woldug rom ni grain.

“Ma dab mu lith ba fak e saf ara kaming u fithik’ logowen e thuth rok e chitiningin.”-

27Me ga’ar SOMOL ngak Moses, “Mu yoloy e pi thin ney nga but’, ya daken e pi thin ney e gube ngongliy riy e m’ag u thildow nge piyu Israel.” 28Me par Moses rok SOMOL u rom ni aningegi ragag e rran nge nep’, ni dariy ban’en nra kay ara garbod ngay. Me yoloy nga daken fa gal yang i malang fapi thin ko fare m’ag, ni aram fare Ragag i Motochiyel.

Moses ni sul u daken fare Burey nu Sinai nga but’

29Fa’ani yib Moses u daken e Burey ni Sinai nga but’ ni be fek fa Ragag i Motochiyel, ma be galgal ram’en owchen ni bochan e ku ur nonow SOMOL; machane ir e dar nang ni be galgal ram’en owchen.- 30Me changar Aron nge urngin e girdi’ ngak Moses, miyad guy ni be galgal ram’en owchen, miyad tamdag ni ngar chugurgad ngak. 31Me piningrad Moses, me sul Aron ngak nge urngin e pi’in yad be yog e thin rok piyu Israel, me welthin Moses ngorad. 32Ma aram me yib fapi girdi’ nu Israel ra longobiyed Moses u but’, me pi’ Moses urngin fapi motochiyel ngorad nike pi’ SOMOL ngak u daken e Burey ni Sinai. 33Ma fa’ani mu’ Moses ko welthin ngorad, me upunguy bangi mad nga owchen. 34Gubin ngiyal’ nra yan Moses ngalan fare Tent nga p’eowchen SOMOL ni nge non ngak SOMOL, me chuweg fa gi mad u owchen nge mada’ ko ngiyal’ nike yib nga wean. Ma nap’an nra yib nga wean, me weliy ngak e girdi’ nu Israel urngin e tin keyog SOMOL ngak ni nge weliy ngorad, 35miyad guy owchen ni be galgal ram’en. Ma aram me upunguy owchen bayay nge par nib upong nge mada’ ko ngiyal’ ni ngki yan nge non ngak SOMOL.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index